વિદેશના મીડિયાએ વડાપ્રધાનના દંભને ખૂલ્લો પાડ્યો તેથી મોટો ફાયદો થયો !

USA નું અખબાર ‘વોશિંગ્ટન પોસ્ટ’ લખે છે : “હજારો લોકો મેચ જોવા ગયા; કુંભમેળામાં લાખોની ભીડ થઈ; ચૂંટણી રેલીઓ થઈ; અને કોરોના જીવ લેનારો બન્યો !” UKનું અખબાર ‘ગાર્ડિયન’ લખે છે : “ભારતના PM કોરોનાના વધતા કેસો વચ્ચે ચૂંટણી રેલીઓ કરતા રહ્યા ! ભારતમાં જે કંઈ બની રહ્યું છે તે માત્ર સરકારની નિષ્ફળતા નથી; પરંતુ તેમના તરફથી માણસાઈ સામે કરવામાં આવતો અપરાધ છે !” પ્રતિષ્ઠિત ‘ટાઈમ’ મેગેઝિને કવર સ્ટોરી લખી છે : “અમીરોને પોતાની વગથી હોસ્પિટલમાં જગ્યા મળે છે; ગરીબ/મધ્યમવર્ગ રોડ ઉપર દમ તોડે છે. વડાપ્રધાનની નિષ્ફળતાને કારણે કોરોના ઘાતક બન્યો !” ઉપરાંત ‘ન્યૂયોર્ક ટાઈમ્સ’ / ‘વોલ સ્ટ્રીટ જર્નલ’/ ‘ધી ઓસ્ટ્રેલિયન’/ ‘સ્ટ્રેટ્સ ટાઈમ્સ’ અને બીજા અખબારો/મેગેઝિનોમાં ભારતના PMની કલઈ ઉખાડવામાં આવી છે. જ્યારે ભારતના અખબારો સરકારના માહિતીખાતાની અખબારીયાદીને પ્રથમ પાને મુખ્ય હેડિંગ સાથે ચમકાવે છે ! ટીવી ન્યૂઝ ચેનલો PMનું નામ લેવાને બદલે ‘સીસ્ટમ’ ઉપર ઠીકરાં ફોડે છે ! માણસાઈને/ સચ્ચાઈને સાથ આપવાને બદલે સત્તાને સાથ આપે છે !

આ સ્થિતિમાં વિદેશનું મીડિયા સત્યની સાથે ઊભું રહ્યું છે. BBC/CNN/DW/ ફ્રાન્સ-24/ અલ ઝઝીરા અને CNA જેવી અનેક ન્યૂઝ ચેનલો ઉપર ભારતની સ્થિતિ અંગે જે રીતે રીપોર્ટિંગ થઈ રહ્યું છે તે પત્રકારત્વનું શ્રેષ્ઠ ઉદાહરણ છે. જ્યારે ભારતી ન્યૂઝ ચેનલો કંઈક જુદું જ ચિત્ર રજૂ કરે છે અને તેમાં ભક્તિનું તત્વ સૌથી વધારે હોય છે. વિદેશના મીડિયાએ વડાપ્રધાનના દંભને ખૂલ્લો પાડ્યો તેથી મોટો ફાયદો થયો ! વિદેશી અખબારો/ચેનલોના સાચા અહેવાલોનો ફાયદો એ થયો કે વિશ્વના દેશો; ભારતને તાત્કાલિક ‘સહાય’; જેમાં મેડિકલ ઉપકરણો/ ઓક્સિજન/ વેક્સિન/ દવાઓ/આર્થિક મદદ પહોંચાડી રહ્યા છે. જેનાથી હજારો લોકોના જીવ બચશે. દંભ ઘાતક છે; સત્ય માનવીઓના જીવ બચાવે છે !