સરકાર મોતના આંકડા છૂપાવે છે કેમ?

સરકારને હવે શરમ આવે છે. મોટા ઉપાડે સભાઓ ગજવી/ક્રિકેટ સ્ટેડિયમમાં જલસો ગોઠવ્યો/પક્ષપ્રમુખની રજતતુલાઓ યોજી/પેજ પ્રમુખોના મેળાઓ યોજ્યા. માસ્ક અને સોશિયલ ડિસ્ટન્સના ધજાગરા ઉડાવ્યા; હવે ક્યા મોઢે બચાવ કરે? નાક બચાવવાનો સહેલો રસ્તો છે મોતના આંકડા જ છૂપાવી દો ! રોજગારની કોઈ વાત ન કરે એટલે બેરોજગારીના આંકડા છૂપાવવાના બદલે આંકડા જ ગૂમ કરી દો ! લોકડાઉનમાં કેટલા શ્રમિકોના મોત થયા; કેટલા શ્રમિકો બેરોજગાર બન્યા તેના આંકડા જ મળતા નથી ! ઉદ્દેશ્ય એ છે કે આંકડા છૂપાવવાથી સરકારની કામગીરી ફૂલગુલાબી દેખાય છે !

સરકાર વિરોધ સહન કરી શકતી નથી; એટલે કાળા વાવટા કોઈ દેખાડે નહીં; એની જ ચિંતા પોલીસ વધુ કરે છે. વિરોધપક્ષને/સામાજિક કાર્યકર્તાઓને જેલમાં પૂરે છે. ચૂંટણીપંચ સત્તાપક્ષની પાંખ હોય તે રીતે એક તરફી કામ કરે છે. હાઈકોર્ટ/સુપ્રિમકોર્ટમાં પણ ડર બેસી ગયો છે. અયોગ્ય શાસક; રાષ્ટ્રવાદ અને રામમંદિરની છત્રી હેઠળ પોતાની નકટાઈ/નાગાઈ/તાનાશાહીને ઢાંકીને લોકોને છેતરી રહ્યા છે ! સરકાર પોતાના ગંદા ચહેરાને કોર્પોરેટ મીડિયા દ્વારા રુપરુપના અંબાર જેવો દેખાડે છે અને રામમંદિરની વાતો કરી આપણી તાળીઓ ઉઘરાવે છે ! રાષ્ટ્રવાદના ડાકલાં વગાડી આપણને ધૂણાવે છે ! એટલે સરકાર 240 ના આંકડાને 17 માં ફેરવી નાખે તોપણ આપણને કંઈ અજુગતું લાગતું નથી !